Astrology of all Zodiac Signs Stars

ٹیرٹ کارڈ کے ذریعے پیشن گوئی کریں
ٹیرٹ کارڈ کے ذریعے پیشن گوئی کریں
ٹیرٹ کارڈز کے ذریعے قسمت کا حال بڑی آسانی سے معلوم کیا جاسکتا ہے اور آنے والے وقت کے بارے میں رہنمائی لی جاسکتی ہے۔ یہ علم یورپ و امریکہ میں بہت مقبول ہے۔ کچھ برسوں سے پاکستان اور انڈیا میں بھی ٹیرٹ کارڈز مقبول ہوتے جارہے ہیں۔ٹیرٹ کارڈز کی تعداد بائیس ہے اور ہر کارڈ کا اپنا خاص مفہوم ہے۔ اس ویب سائٹ کے ذریعے آپ بھی ٹیرٹ کارڈزکو استعمال کر کے مستقبل کے حالات پتہ کر سکتے ہیں اور قبل از وقت مناسب حکمت عملی اختیار کر سکتے ہیں۔
اسکا طریقہ یہ ہے کہ جو بات معلوم کرنی ہو، اسے ذہن میں رکھ کر ٹیرٹ کارڈز کو الٹا کر کےپھینٹیں یعنی ان کی ترتیب بدلیں۔ اب ان میں سے کوئی سے چار کارڈزالگ نکال کر الٹے رکھ دیں۔ اب جس ترتیب سے چاروں کارڈ رکھے ہیں، باری باری اسی ترتیب سے کارڈ کو اٹھائیں اور دیکھیں کہ کارڈ کون سا ہے یعنی اس کا مفہوم کیا ہے۔ان چاروں کارڈز کے مفہوم کے ذریعے آپ کو اپنے سوال کا جواب مل جائے گا۔
تمام بائیس ٹیرٹ کارڈز کا تعارف اورمفہوم نیچے دیا گیا ہے۔اس کے ذریعے آپ اپنا اور دوسروں کی قسمت کا حال باآسانی معلوم کرسکتے ہیں۔
کارڈ نمبر 0 (مسخرہ)
 
ٹیرٹ کارڈ نمبر 0 پرایک مسخرے کی شکل بنی ہوئی ہے،جس کے چہرے کے قریب ایک تتلی اڑرہی ہے۔مسخرے نے چھڑی کے ذریعے ایک بیگ اٹھایا ہوا ہے، جس میں اس کا نہایت مختصر سامان ہے۔
اگریہ کارڈ سیدھاآئے تو اس کا مطلب مستقبل کے متعلق بےفکری اورایک نئے دور کا آغازہے۔ لیکن اگر یہ کارڈ الٹا آئے تو یہ غلط فیصلے، وسائل کی کمی، بے وقوفی، مستقبل کی ناامیدی اور پلاننگ کی کمی کو ظاہر کرتاہے، لہذاآپ کو ان کمزوریوں پر قابو پانا چاہیے۔
کارڈ نمبر 1 (جادوگر)
 
ٹیرٹ کارڈ نمبر 1 پرایک جادوگرکی شکل بنی ہوئی ہے،جس نے ایک بہت بڑا ہیٹ پہنا ہوا ہے۔ اس کے آگے پڑی میز پر مختلف قسم کے آلات رکھے ہوئے ہیں مثلاً چھڑی، سکہ، تلوار، کپ وغیرہ۔
اگریہ کارڈ سیدھاآئے تو اس کا مطلب کامیابی و کامرانی، قوت ارادی کی مضبوطی اور شخصیت کا اظہار ہے۔ لیکن اگر یہ کارڈ الٹا آئے تو یہ قوت ارادی کی کمزوری، ہچکچاہٹ اور حقیقت پسندی سے فرار کو ظاہر کرتا ہے ، جو انسان کے لیےمزید پریشانیوں کی علامت ہے، لہذاآپ کو اپنی ان کمزوریوں پر قابو پانے کی ضرورت ہے۔
کارڈ نمبر 2 (راہبہ)
 
ٹیرٹ کارڈ نمبر 2 پرایک عقلمند مذہبی خاتون کی شکل بنی ہوئی ہے، جس نے عمدہ لباس اور سر پر ایک تاج پہنا ہوا ہے۔ اس کی گود میں ایک کتاب ہے اور پیچھے ایک پردہ لٹکا ہوا ہے۔ پیچھے دو مینار بھی دکھائے گئے ہیں۔
اگر یہ کارڈ سیدھا آئے تو اسکا مطلب ہے کہ مشکلات کے نئے اور بہتر قابل عمل حل ملیں گے، امیدیں پوری ہوں گی، یا پوشیدہ راز کھل جائیں گے۔ سیدھا کارڈ یہ بھی ظاہر کرتا ہے کہ کوئی دانشور خاتون آپ کی زندگی پر اثر انداز ہوگی، اور اگرآپ عورت ہیں تو آپ کی تخلیقی صلاحیتیں نمایاں ہونگی۔ اگر یہ کارڈ الٹا آئے تو اس کا مطلب یہ ہے کہ آپ کے جذباتی فیصلے آپ کو نقصان پہنچائیں گے، یا کسی بری عورت سے آپ کے تعلقات بدنامی کا باعث بنیں گے، لہذا آپ کو چاہیے کہ اپنے طرز عمل میں بہتری لائیں۔
کارڈ نمبر 3 (ملکہ)
 
ٹیرٹ کارڈ نمبر 3 پرایک ملکہ کی شکل بنی ہوئی ہے، جس نے تاج پہنا ہے اور ہاتھ میں شاہی چھڑی پکڑکر دروازے سے باہر بیٹھی ہوئی ہے۔یہ نہایت پروقار دکھائی دیتی ہے۔ اس کے پاس ایک ڈھال پڑی ہے جس پر ایک عقاب بنا ہوا ہے۔ یہ ملکہ فہم و فراست اور محبت کی علامت ہے اور یہ اپنی رعایا کے مسائل حل کرنا چاہتی ہے۔
اگر یہ کارڈ سیدھا آئے تو اسکا مطلب امیدوں کا پورا ہونا اور مادی چیزوں کی زیادتی ہے۔ اس کے علاوہ یہ گھریلو معاملات میں توازن، ہمدردی، ایمان داری اور حفاظتی اقدامات کو بھی ظاہر کرتا ہے۔ اگر یہ کارڈ الٹا آئے تو یہ گھریلو فساد، لڑائی جھگڑےاور دیگر نقصانات کو ظاہر کرتا ہے۔اس کے علاوہ یہ بے ایمانی، بد احتیاطی اور دشمن کو بھی ظاہر کرتا ہے، لہذا آپ کو چاہیے کہ ان معاملات میں محتاط رہیں۔
کارڈ نمبر 4 (بادشاہ)
 
ٹیرٹ کارڈ نمبر 4 پرایک بادشاہ کی شکل بنی ہوئی ہے، جو اپنے تخت پر بیٹھا ہواہے۔ اس نے سر پر تاج پہنا ہوا ہے اور اس کے ہاتھ میں ایک مضبوط چھڑی ہے۔ یہ بادشاہ محبت کی بجائے قوت کی علامت ہے۔
اگر یہ کارڈ سیدھا آئے تو اسکا مطلب فتح، انتظامی صلاحیت، مضبوط قوت ارادی، اورزندگی کے تجربات سے فائدہ اٹھانا ہے۔لیکن اگر یہ کارڈ الٹا آئے تو یہ کمزوری، انتظامی صلاحیت کی کمی اور اسی طرح کی دیگر خامیوں کو ظاہر کرتا ہے، جن سے بچنا آپ کے لیے بہتر ہوگا۔
کارڈ نمبر 5 (پادری)
 
ٹیرٹ کارڈ نمبر 5 پرایک پادری کی شکل بنی ہوئی ہے، جو اپنے سامنے گھٹنوں کے بل جھکے دو چھوٹے پادریوں کو شاباش دے رہا ہے۔ یہ پادری عقلمندی، تقدس اور اخلاقیات کی علامت ہے۔
اگر یہ کارڈ سیدھا آئے تو اسکا مطلب روحانی امداد، اچھے مشورے، اور مفید معلومات کا حاصل ہونا ہے۔ لیکن اگر یہ کارڈ الٹا آئے تو غلط اطلاع، غلط مشورے اورجھوٹ کو ظاہر کرتا ہے، لہذا ان معاملات میں احتیاط کریں۔
کارڈ نمبر 6 (محبت)
 
ٹیرٹ کارڈ نمبر 6 پرایک نوجوان آدمی ہے جودو عورتوں کے درمیان گھرا ہوا ہے۔ دونوں عورتوں کی یہ کوشش ہے کہ اس نوجوان کا جھکاؤ اسکی طرف ہو جائے۔ لیکن وہ نوجوان یہ فیصلہ نہیں کر پاتا کہ اسے کس کی طرف جانا چاہیے۔ ان تینوں کے درمیان تعلق کو یوں بھی سمجھا جا سکتا ہے کہ ایک طرف اس کی محبوبہ ہے اور دوسری طرف اس کی ماں ہے۔اور وہ یہ فیصلہ کرنے میں مشکل محسوس کرتا ہے کہ اس کا جھکاؤ کس طرف ہونا چاہیے۔ان تینوں کے سروں پر محبت کا فرشتہ ہاتھ میں تیر کمان لیے کھڑا ہے اوراسکا مقصد ان کو نشانہ بنانا ہے۔
اگر یہ کارڈ سیدھا آئے تو اسکا مطلب الجھے ہوئے راستے کو سلجھانا، مضبوط قوت فیصلہ، عقل سے زیادہ وجدان پر بھروسہ کرنا، کردار کی پختگی اور اخلاقی بلندی ہے ۔ لیکن اگر یہ کارڈ الٹا آجائے تو یہ اخلاقی پسماندگی، کردار میں کمزوری، قوت فیصلہ کی کمی اور خواہشات کا غلام ہونے کو ظاہر کرتا ہے، لہذا اگر آپ کامیاب ہونا چاہتے ہیں تو ان پہلوؤں کی طرف خصوصی توجہ دیں۔
کارڈ نمبر 7 (بگھی)
 
ٹیرٹ کارڈ نمبر 7 پرایک امیر آدمی کی شکل بنی ہے، جو ایک قیمتی بگھی پر بیٹھا ہوا ہے جس کو دو گھوڑے کھینچ رہے ہیں۔ اس آدمی کے جسم پر ذرہ بکتر ہے۔سات نمبر ترقی کا نمبر مانا جاتا ہے۔
اگر یہ کارڈ سیدھا آئے تو اس کا مطلب ترقی، کامیابی، مشکلات پر حاوی ہونا، اور وراثت کی بجائے ذاتی کوششوں سے فتح حاصل کرناہے۔ اگر یہ کارڈ الٹا آئے تو یہ تنزلی، ناکامی، اپنی کوششوں اور قوتوں کے غلط سمت میں استعمال، اور دوسروں کے حقوق غصب کرنے کو ظاہر کرتا ہے، لہذا اپنے طرز عمل پر نظر ثانی کریں۔
کارڈ نمبر 8 (جج)
 
ٹیرٹ کارڈ نمبر 8 پرایک سخت گیر خاتون جج کی تصویر ہے، جو ایک تخت پر بیٹھی ہوئی ہے۔اس کے دائیں ہاتھ میں ایک تلوار ہے اور بائیں ہاتھ میں ایک ترازو ہے۔ اس نے سر پر ایک کپڑا باندھا ہوا ہے۔
اگر یہ کارڈ سیدھا آئے تو اس کا مطلب انصاف کا حاصل ہونا اور گفت و شنید کے ذریعے معاملہ کا حل ہے۔ اگر آپ کا اخلاق اچھا ہے تو یہ کارڈ امید کی علامت ہے اور اگر اخلاق اچھا نہیں ہے تو یہ کارڈ خوف کی علامت ہے۔ اگر یہ کارڈ الٹا آئے تو یہ قانونی رکاوٹوں،مشکل اور پیچیدہ حالات، اور نا انصافی کو ظاہر کرتا ہے، لہذا مناسب حکمت عملی اپنائیں۔
کارڈ نمبر 9 (عبادت گزار)
 
ٹیرٹ کارڈ نمبر 9 پرایک بوڑھا آدمی کسی اندھیری اورٹوٹی پھوٹی سڑک پر چل رہا ہے۔ وہ سڑک پر چھائے ہوئے اندھیرے کو ہاتھ میں پکڑی ہوئی ٹارچ سے دور کرنے کی کوشش کرتا ہے۔ اسکی کوشش ہے کہ تیز ہوا سے ٹارچ کی آگ بجھ نہ پائے۔ اس کی چھڑی کے گرد لپٹا ہوا سانپ اس بات کی نشاندہی کرتا ہے کہ اس نے اپنی عقلمندی سے شیطانی خواہشات پر قابو پا لیا ہے۔
اگر یہ کارڈ سیدھا آئے تو اسکا مطلب اچھی پلاننگ، مستقبل کی فکر اور درست راستے پر چلنا ہے۔ اگر یہ کارڈ الٹا آئے تو یہ اپنی قوتوں کو شیطانی راہوں پر استعمال کرنے، کم عقلی کا مظاہرہ کرنے اور عمدہ مشورے سننے سے انکار کو ظاہر کرتا ہے، لہذا آپکو اس طرزعمل کو بدلنے کی ضرورت ہے۔
کارڈ نمبر 10 (قسمت کا پہیہ)
 
ٹیرٹ کارڈ نمبر 10 پرایک پہیہ بنا ہوا ہے، جس پر بلائیں چڑھی ہوئی ہیں۔ پہیے کے اوپرموجود بلا (اژدھا) کے ہاتھ میں تلوار ہے۔ پہیہ کے دائیں طرف دوسری بلا (بندر سے ملتی جلتی)ہے ، جبکہ بائیں طرف ایک لنگور ہے جو پہیے کے اوپر سے نیچے کی طرف آرہا ہے۔ ایک بندر جو کہ زمین پر ہے، اس پہیے کو گھما رہا ہے۔
اگر یہ کارڈ سیدھا آئے تو اسکا مطلب اچھے وقت کی آمد، ذہنی سکون، منزل پرپہنچنا، ایک جستجو کا مکمل ہونا اور کسی نئی جستجو کا شروع ہونا ہے۔ اگر یہ کارڈ الٹا آئے تو یہ اچھے حالات سے برے حالات کی طرف جانے اور ذہنی پریشانیوں کے خدشے کو ظاہر کرتا ہے، لہذا وقت سے پہلے اچھی منصوبہ بندی کر لیں۔
کارڈ نمبر 11 (صبروتحمل)
 
ٹیرٹ کارڈ نمبر 11 پرایک بہادر عورت نے اپنے دونوں ہاتھوں سے ایک شیر کے دونوں جبڑوں کو پکڑا ہوا ہے۔ اس کا چہرہ اس مشکل صورت حال کے باوجود بھی بڑا پرسکون اور پروقار ہے۔یہ کارڈ عموماً خطرے کی نشاندہی کرتا ہے، لیکن شیر کو شکست دینا اس چیز کی دلیل ہے کہ انسان کے لیے یہ مشکل نہیں ہے کہ وہ اپنی خامیوں سے آگاہ ہوکر اپنی اصلاح کرے اور اپنے اندر چھپی ہوئی قوتوں کو استعمال کرکے ہر طرح کے حالات کا مقابلہ کرسکے۔
اگر یہ کارڈ سیدھا آئے تو اسکا مطلب صبروتحمل، اپنی کمزوریوں پر غور، مخالفین سے صلح کی ضرورت اورخیالی منصوبوں کی عملی شکل بننا ہے ۔اگر یہ کارڈ الٹا آئے تو یہ مالی نقصان، بے صبری، اعصاب کی کمزوری وغیرہ کو ظاہر کرتا ہے، لہذا مناسب حکمت عملی اختیار کرنے کی ضرورت ہے۔
کارڈ نمبر 12 (الٹا لٹکا آدمی)
 
ٹیرٹ کارڈ نمبر 12 پرایک ایسے آدمی کی تصویر ہے جس کا سر نیچے اور ٹانگیں اوپر کی طرف ہیں۔ اس کی ایک ٹانگ درخت کی ایک ٹہنی کے ساتھ بندھی ہوئی ہے، جبکہ دوسری ٹانگ کو اس کی لٹکی ہوئی ٹانگ کے گرد لپٹا دکھایا گیا ہے۔ اس کے دونوں بازو کمر کے گرد لپٹے ہوئے ہیں ۔ الٹا لٹکا ہوا آدمی جس درخت سے لٹکا ہوا ہے وہ دراصل زندگی کا درخت ہے۔ یہ آدمی اپنی قسمت کو اپنی مرضی کے مطابق ڈھالنا چاہتا ہے۔ وہ مشکلات سے گھبراتا نہیں بلکہ اپنی مخالف قوتوں پر قابو پانا چاہتاہے۔
اگر یہ کارڈ سیدھا آئے تواسکا مطلب ہے کہ آپ کواپنے مقاصد پر فوکس کرنے، اپنے رویے میں لچک پیدا کرنے اور صحیح وقت پر فیصلہ کرنے کی ضرورت ہے۔ اگر یہ کارڈ الٹا آئے تو یہ حقیقت سے فرار اورذہنی انتشار وغیرہ کو ظاہر کرتا ہے، لہذا اس طرف توجہ دیں۔
کارڈ نمبر 13 (موت)
 
ٹیرٹ کارڈ نمبر 13 پرایک انسانی ڈھانچہ بنا ہوا ہے جس کے ہاتھوں میں ایک بہت بڑی درانتی ہے اور وہ سیاہ زمین پر کاشتکاری کرتا دکھائی دیتا ہے۔ اس کی فصل گندم یا مکئی وغیرہ نہیں بلکہ کئی انسانی جسم ہیں اور کئی انسانی سر اس ڈھانچے کے قدموںمیں بکھرے ہوئے ہیں۔ یہ دراصل موت کا منظر ہے۔
چونکہ موت کے بعد انسان ایک حالت سے دوسری حالت میں بدل جاتا ہے، اس لیے یہ کارڈ حالات میں بہت بڑی تبدیلی کو ظاہر کرتا ہے۔اگر یہ کارڈ سیدھا آئے تو یہ تبدیلی برے حالات سے اچھے حالات کی طرف ہوگی۔ اگر یہ کارڈ الٹا آئے تو یہ اچھے حالات سے برے حالات کی طرف تبدیلی کو ظاہرکرتا ہے۔
کارڈ نمبر 14 (ذاتی انا پر قابو)
 
ٹیرٹ کارڈ نمبر 14 پرایک ایسی عورت کو دکھایا گیا ہے جس کے فرشتوں جیسے پر ہیں اور وہ اپنے دائیں ہاتھ میں پکڑے ہوئے برتن سے بائیں ہاتھ میں پکڑے ہوئے برتن میں کچھ انڈیل رہی ہے، جو کہ دو چیزوں کے یکجا ہونے کو ظاہر کرتا ہے۔
اگریہ کارڈ سیدھا آئے تو اسکا مطلب ہے کہ اگر احتیاط سے منصوبہ بندی کی جائے تو کامیابی یقینی ہوگی، نیز اختلافات کے ختم ہونے، انا کو چھوڑنے اور اعتدال کی ضرورت کو بھی ظاہر کرتا ہے۔ اگر یہ کارڈ الٹا آئے تو یہ اختلافات، افراد کی ذہنی غیر آہنگی ، توانائی کا ضیاع وغیرہ کو ظاہر کرتا ہے، لہذا ان پہلوؤں کی طرف خاص توجہ دیں۔
کارڈ نمبر 15 (شیطان)
 
ٹیرٹ کارڈ نمبر 15 پر شیطان کی تصویر دکھائی گئی ہے، جو ایک اونچے چبوترے پر بیٹھا ہوا ہے۔ اس کے سامنے ایک عورت اور ایک مردہیں، جن کی گردن میں زنجیر پڑی ہوئی ہے، جو شیطان کے چبوترے سے منسلک ہے۔شیطان کی طرح ان کے بھی سینگ اور دم ہیں، جو کہ ان کے حیوانی کاموں کو ظاہرکرتے ہیں۔ ذرا غورکریں تو معلوم ہو گا کہ انکی گردنوں کے گرد زنجیر ذرا ڈھیلی ہے، جس کا مطلب ہے کہ انسان ذرا سی عقل اور کوشش سے شیطان کی قید سے نکل سکتا ہے۔
اگر یہ کارڈ سیدھا آئے تو یہ توانائی کے غلط کاموں میں استعمال ہونے کی طرف اشارہ ہے۔ اگر یہ کارڈ الٹا آئے تو یہ نفسانی خواہشات کے غالب آنے کو ظاہر کرتا ہے، لہذا آپ کو اپنے طرز عمل میں تبدیلی لانے کی ضرورت ہے۔
کارڈ نمبر 16 (مینار)
 
ٹیرٹ کارڈ نمبر 16 پر ایک مینار دکھایا گیا ہے جس میں سے روشنی نکل رہی ہے اوراس کا اوپر والا حصہ دھماکے سے ٹوٹا ہوا ہے اور اس میں سے آگ نکل رہی ہے۔ جبکہ دو انسان اس مینار سے نیچے زمین پر گر رہے ہیں۔
اگر یہ کارڈ سیدھا آئے تو یہ خدائی مدد ملنے، نیک نامی اور دوسروں سے ہم آہنگی کرنے کا اشارہ ہے۔ اگر یہ کارڈ الٹا آئے تو اس کا مطلب ہے کہ آپ اپنی جلد بازی اور بے وقوفی کی وجہ سے خدائی امداد سے محروم ہو جائیں گے، نیز آپکے بغض اور خودپرستی کی طرف بھی اشارہ ہے، جن سے آپ کو دور رہنا چاہیے۔
کارڈ نمبر 17 (ستارہ)
 
ٹیرٹ کارڈ نمبر 17 پرایک لڑکی گھٹنوں کے بل ایک ندی کے کنارے بیٹھی دو برتنوں سے پانی گرا رہی ہے۔ اس کے سر پر کھلا آسمان ہے جس پر آٹھ ستارے دکھائی دے رہے ہیں۔ ان میں سے ایک ستارہ بڑا واضح ، چمکدار اور باقی ستاروں سے جسامت میں بڑا ہے۔
اگر یہ کارڈ سیدھا آئے تو یہ آنے والے واقعات کےمتعلق پرامید رہنےاورآپکی کوششوں کے ضائع نہ ہونے کا اشارہ ہے۔ اگر یہ کارڈ الٹا آئے تو یہ مستقبل کے حوالے سے ناامیدی اور اپنا نقطہ نظر بیان کرنے کی صلاحیت کا نہ ہونا ظاہر کرتا ہے، لہذا آپ کو اس طرف خاص توجہ دینی چاہیے۔
کارڈ نمبر 18 (چاند)
 
ٹیرٹ کارڈ نمبر 18 پررات کا منظر ہے۔ ایک تالاب ہے، جس میں سے ایک کیکڑہ اچھل کر باہر آنا چاہتا ہے۔ اس تالاب کے گرد دو جانور بیٹھے ہیں۔ پیچھے دو مینار ہیں ، جن کے اوپر چاند اپنی پوری آب و تاب سے چمک رہا ہے۔ ہوا میں خنکی ہے اور یوں محسوس ہوتا ہے کہ پانی کے قطرے آسمان سے نیچے گررہے ہیں۔ اس کے پیچھے یہ نظریہ ہے کہ جب کسی اچھے انسان کا انتقال ہوتا ہے تو اس کی روح آسمان کی بلندیوں کی طرف پرواز کرجاتی ہے اور جب کسی برے انسان کا انتقال ہوتا ہے تو اس کی روح زمین پر ہی رہ جاتی ہے اور جانوروں میں منتقل کردی جاتی ہے۔
اگر یہ کارڈ سیدھا آئے تو اسکا مطلب ہے کہ اپنی وجدانی قوتوں پر بھروسہ کریں، جلد ہی منزل آپ کے سامنے ہو گی۔ اگر یہ کارڈ الٹا آئے تو یہ ظاہر کرتا ہے کہ آپ کو ابھی اپنی منزل کا درست علم نہیں ہے، لہذا آپ کو اپنے مقاصد کا تعین کرنے کی ضرورت ہے، نیز ماضی کی ناکامیوں کو ذہن سے نکال دیں۔
کارڈ نمبر 19 (سورج)
 
ٹیرٹ کارڈ نمبر 19 پر دکھایا گیا ہے کہ سورج پوری آب وتاب سے چمک رہا ہے۔ دیوار پر بہت سے خوبصورت سورج مکھی کے پھول ہیں۔ جبکہ دو بچے دیوار کے نزدیک کھڑے ڈانس کررہے ہیں۔سورج کی شعاعوں سے کسی سیال شے کے قطرے برآمد ہوتے دکابئی دےرہے ہیں۔ یہ کارڈ ظاہر کرتا ہے کہ جب تک ہم بچوں جیسی روح حاصل نہ کر لیں، ہم جنت میں داخل نہیں ہوسکتے۔
اگریہ کارڈ سیدھا آئے تواس سے مرادنئی معلومات کا ملنا، برے خیالات سے نجات، کامیابی، خیالات کو مادی اور عملی شکل دینےمیں کامیاب ہوجانا، ایمانداری، بے گناہی کا ثبوت اور روحانی قوت ملنا ہے۔ اگر یہ کارڈ الٹا آئے تو یہ اندازوں کی غلطی، خیالی پلاؤ پکانے اور خیالات کی ناپختگی وغیرہ کو ظاہر کرتا ہے، لہذاآپ کو ان معاملات پر توجہ دینے کی ضرورت ہے۔
کارڈ نمبر 20 (قیامت کا دن)
 
ٹیرٹ کارڈ نمبر 20 میں ایک پروں والافرشتہ آسمان پر ظاہر ہورہا ہے، جس کے ہاتھ میں ایک باجا ہے۔ اس کے باجے کی آواز سن کر قبروں سے کچھ لوگ باہر نکل رہے ہیں۔
اگر یہ کارڈ سیدھا آئے تو یہ انعام اورمنزل پر پہنچنے کی خوشی کو ظاہر کرتا ہے۔ اگر یہ کارڈ الٹا آئے تو یہ سزا، نقصان ، پریشانی، گمراہی اورنا انصافی کو ظاہر کرتا ہے، اس صورتحال میں آپ کو چاہیے کہ زندگی کی مصروفیات سے وقت نکال کر کچھ دیر کے لیے سوچیں کہ آپ کی زندگی کدھر جا رہی ہے اور اس زندگی نے آپ کو کیا سبق دیے ہیں۔
کارڈ نمبر 21 (دنیا)
 
ٹیرٹ کارڈ نمبر 21 پرایک نوجوان عورت ہے جس کے گرد پھولوں کے انبار ایک دائرے کی صورت میں ہیں۔ اس عورت نے نفیس لباس زیب تن کررکھا ہے اور اس کے دونوں ہاتھوں میں جادو کی چھڑیاں ہیں۔ سب سے اہم بات یہ ہے کہ اس کے گرد پھولوں کے دائرے کے باہر چاروں کونوں پر مختلف جانور بیٹھے ہوئے ہیں۔
اگر یہ کارڈ سیدھا آئے تو یہ کوشش کی کامیابی، حالات پر قابو پانے، اورکسی زیر تکمیل معاملے کے بخیر و خوبی انجام پانے کا اشارہ ہے۔ اگر یہ کارڈ الٹا آئے تو یہ خواہشات کی ناکامی، حالات پر قابو پانے کی اہلیت کے فقدان اور نقصان کو ظاہر کرتا ہے۔