آپ نہیں چاہتے کہ لوگوں کو آپ کے کمزورپہلوؤں کا پتہ چلے،یہ انسانی فطرت ہے۔لیکن بہتر یہی ہے کہ آپ آہستہ آہستہ اپنی کمزوریوں کو دور کرنے کی منصوبہ بندی کریں۔جتنی انرجی آپ اپنی کمزوریوں کو چھپانے میں استعمال کرتے ہیں،اس سے کم انرجی استعمال کرکے آپ اپنی کمزوریوں کو دور کر سکتے ہیں۔
آپ جس طرح کے لوگوں میں بیٹھیں گے،اُن کی خوبیوں یا خامیوں کا کچھ حصہ لازمی طور پرآپ کی شخصیت کا حصہ بن جائے گا۔پرفیوم کی دکان پر بیٹھنے سے خود بخودآپ سے خوشبو آنا شروع ہو جائے گی،جبکہ کوئلے کی دکان پر بیٹھنے سے خود بخود آپ کے کپڑوں پر سیاہ نشان لگ جائیں گے۔اس کی وجہ یہ ہے کہ ہر انسان کے گرد،اُس کی اچھائی یا برائی کے مطابق ،انرجی کا ایک حلقہ ہوتا ہے،جسے اورا (Aura) کہتے ہیں۔یہ انرجی اُس کے پاس بیٹھنے والے دوسرے انسانوں کو متاثر کرتی ہے۔
بعض اوقات کم سے کم مزاحمت کا طریقہ اپنانابہتر ہوتا ہے،تا کہ آپ کی توانائیاں محفوظ رہیں۔وقت گزرنے کے ساتھ صورتحال زیادہ واضع ہو جائے گی،اور آپ بہتر حکمت عملی کے ساتھ آگے بڑھ سکیں گے۔زندگی ٹی ٹونٹی یا ون ڈے کرکٹ میچ نہیں ہے،بلکہ یہ ٹیسٹ میچ کی طرح ہے،اس میں بعض اوقات مناسب وقت کا انتظار کرنا پڑتا ہے۔
چھوڑدیجئے،جو گزر گیا،اُس پر افسوس کرنے سے وہ نقصان پورا نہ ہو گا بلکہ اس طرح آئندہ کا وقت بھی ضائع ہو جائے گا۔اگر آپ نے ماضی میں کوئی غلطیاں کی ہیں تو ان کا مداوا ممکن ہے،کیونکہ آپ کے پاس آگے کی زندگی تو ہے ناں۔آپ اپنے مقاصد کا تعین کر کے کامیابیاں حاصل کر سکتے ہیں۔اپنے وقت کو منظم کرنا اور اسے ترتیب دیناہی آدھی کامیابی ہوتا ہے۔دنیا کا کوئی بھی ہنر مند آدمی ایک دم نہیں سیکھ جاتا،بلکہ وہ اس کام کو بار بار کرنے کی وجہ سے ہنر مند بنتا ہے۔
آپ اکثر سوچتے ہیں کہ سب کچھ قسمت میں پہلے ہی لکھا جا چکا ہے،اس لئے محنت اورکوشش کرنے کی کوئی ضرورت نہیں۔آپکا یہ خیال غلط ہے،کیونکہ قسمت میں یوں لکھا ہوتا ہے کہ فلاں چیز بغیر محنت اورکوشش سے ملے گی،اور فلاں چیزکوشش کرنے سے ملے گی ورنہ نہیں ۔یہ دنیا عمل کی جگہ ہے،اگر ایک کوشش ناکام ہو جائے تو دوبارہ کوشش کریں،اور ہمت نہ ہاریں۔
اپنی صحت کا خاص خیال رکھیں۔شام کو لازمی چہل قدمی کیا کریں۔حکیم لقمان کا قول ہے کہ رات کا کھانا کھانے کے بعدضرور چہل قدمی کرو،خواہ تمہیں کانٹوں پر چلنا پڑے۔
کبھی کبھار تنہائی میں اپنے آپ سے بھی باتیں کر لیا کریں،اس کا ایک فائدہ یہ ہےکہ آپ کو تسلی ہو گی کہ کم از کم کوئی تو توجہ سے سُن رہا ہے۔