آپ نہیں چاہتے کہ لوگوں کو آپ کے کمزورپہلوؤں کا پتہ چلے،یہ انسانی فطرت ہے۔لیکن بہتر یہی ہے کہ آپ آہستہ آہستہ اپنی کمزوریوں کو دور کرنے کی منصوبہ بندی کریں۔جتنی انرجی آپ اپنی کمزوریوں کو چھپانے میں استعمال کرتے ہیں،اس سے کم انرجی استعمال کرکے آپ اپنی کمزوریوں کو دور کر سکتے ہیں۔
کامیابی ایک تتلی کی مانند ہے،اگر آپ اس کے پیچھے بھاگیں گے تو یہ دور بھاگ جائے گی،لیکن اگر آپ اپنے کام میں مگن ہو جائیں گے تو یہ آپ کے کندھے پر آ بیٹھے گی۔انسان کی زندگی میں بعض اوقات ایسے لمحات بھی آتے ہیں کہ جب بہترین راستہ یہی ہوتا ہے کہ ہر طرف سے آنکھیں بند کر کےصرف اپنے مقصد پر توجہ دی جائے۔
لوگوں کے رویے کے پیچھے موجود وجوہات جاننے کی کوشش کریں،اس طرح آپ انہیں زیادہ بہتر طریقے سے ڈیل کرسکیں گے۔یہ وجوہات کچھ بھی ہو سکتی ہیں:آپ کی ذات پر عدم اعتماد،تعلیم کی کمی،احساسِ محرومی،وقت گزاری،عدم تحفط کا احساس ،عادت سے مجبوری وغیرہ۔اگر آپ درست وجہ کو جان لیں تو آپ کے دوسروں سے تعلقات بھی درست ہو جائیں گے۔
اپنا مطالعہ وسیع کریں،اچھی کتابوں اور اچھے مضامین سے تعلق جوڑیں،اس سے آپ کو زندگی کے مسائل کو سمجھنے اور انھیں حل کرنے میں مدد ملے گی۔کتاب سے اچھا دوست اور کوئی نہیں ہوتا۔
اگر دنیا میں کوئی ایک شخص بھی ایسا ہے کہ جس کی زندگی آپ کی وجہ سے بہتر ہوئی ہے،توآپ کو مبارک ہو،آپ کامیاب ہیں۔