جب تک آپ کسی شے کو یاد کرتے رہیں گے،وہ شےآپ کے ساتھ رہے گی: کوئی کامیابی، ناکامی، طاقت، کمزوری، حتیٰ کہ خدا بھی۔لہذا صرف ایسی چیزوں کو یاد رکھیں جو آپ کو انرجی دیں۔مایوسی پیدا کرنے والی چیزوں کوذہن سے مٹا دیں۔
آپ اچھی طرح جانتے ہیں کہ آپ کو کیا کرنا چاہیے،لیکن اپنی سوچ کو عملی شکل دینا اتنا آسان نہیں۔ اس کے لئے آپ کو سُستی اور لاپرواہی سے جان چھڑانی پڑے گی۔ مناسب منصوبہ بندی کر کے باقاعدگی سے کام کو جاری رکھیں۔جو شخص کچھ نہیں کرتا،اُسے بعد میں سب کچھ کرنا پڑتا ہے۔
دوسروں کی تنقید کو زیادہ اہمیت نہ دیں۔دوسرے آپ کو اتنا نہیں جانتے جتنا آپ خود کو جانتے ہیں۔آپ اپنی خوبیوں اور خامیوں سے اچھی طرح واقف ہیں۔اپنی حوصلہ افزائی خود کریں،اچھے کاموں پر اپنے آپ کو شاباش دیں۔ہاں جہاں آپ کو اصلاح کی ضرورت ہے،وہاں اپنے ضمیر کی آواز کو مت دبائیں۔
اگر چھوٹے بچے آپ سے مل کر خوشی محسوس کرتے ہیں ،توآپ کامیاب ہیں۔بچے جنت کے پھول ہیں،ان سے پیار کرنا چاہیے۔
کبھی کبھار تنہائی میں اپنے آپ سے بھی باتیں کر لیا کریں،اس کا ایک فائدہ یہ ہےکہ آپ کو تسلی ہو گی کہ کم از کم کوئی تو توجہ سے سُن رہا ہے۔