گھبرائیں نہیں،مشکلات انسان کی تراش خراش کرتی ہیں۔سائنسی لحاظ سے کوئلہ بھی کاربن ہے اور ہیرا بھی کاربن ہے۔مگر کم پریشروالی جگہ سےکوئلہ نکلتا ہے،اور زیادہ پریشر والی جگہ سے ہیرا نکلتا ہے۔بالکل اسی طرح مسائل آپ کی شخصیت میں نکھار لائیں گے۔
کچھ دیر کے لئے فرض کر لیں کہ آپ ایک بار اس دنیا سے جا چکے ہیں،اور تھوڑے عرصہ کے لئےآپ کو واپس دنیا میں بھیجا گیا ہے۔وہ کون سے کام ہیں جو آپ سے نظر انداز ہو گئے تھے اور اب آپ پہلی ترجیح میں کرنا چاہیں گے؟ خود پر مہربانی کریں اور وہ کام کر ڈالیں۔زندگی بہت قیمتی چیز ہے،اسے ضائع مت جانے دیں۔
اچھا فیصلہ اسی وقت ہو سکتا ہے جب آپ کے پاس صورتحال کے متعلق مکمل معلومات ہوں۔کوئی بھی بڑا قدم اٹھانے سے پہلے اس بات کی تسلی کر لیں کہ کہیں آپ کو جان بوجھ کر غلط معلومات تو نہیں دی گئیں،کہیں کوئی پہلو آپ سے چُھپا تو نہیں رہ گیا، کہیں آپ کسی کے ہاتھوں میں تو نہیں کھیل رہے۔اگر آپ کو ذرا سا بھی شک گزرے تو پھر محتاط حکمت عملی اپنائیں۔
دوپہر کا کھانا تھوڑا کھایا کریں، اس طرح آپ خود کو زیادہ چُست محسوس کریں گے،ورنہ آپ پر سُستی اور غنودگی چھائی رہے گی۔بہتر حکمتِ عملی یہ ہے کہ صبح کا ناشتہ بہت اچھا کیا جائے تا کہ دوپہر کو بھوک کم لگے۔
اعتدال پسندی سے کام لیں،تا کہ صحت کے مسائل پیش نہ آئیں،کیونکہ صحت، دولت سے بھی زیادہ قیمتی چیز ہے۔