کام کی وجہ سے زیادہ ٹینشن مت لیا کریں۔اپنا ٹائم ٹیبل بنائیں،غیر ضروری مصروفیات کو آخر میں رکھیں،اگر وقت بچ جائے توٹھیک ورنہ اپنے کام پر ہی فوکس رکھیں۔یہ کہاں کی دانائی ہے کہ آپ اپنی توانائی اور ٹائم فضول کاموں میں خرچ کر بیٹھیں اور بعد میں پینڈنگ کاموں کا رونا روئیں۔
اگرآپ کا خیال یہ ہے کہ کچھ لوگ آپ کو دل سےپسند نہیں کرتے توکچھ دیر کے لیے خود کو اُن کی جگہ پر رکھ کر سوچیں کہ آپ کا کونسا طرزِعمل ناقابلِ برداشت ہے۔یاد رکھیں کہ دنیا باہمی تعاون کی بنیاد پر چل رہی ہے۔اگر آپ کو اپنا طرزِ عمل بدلنا بھی پڑے تودوسروں کی نظروں میں بلند مقام پانے کے لئے،ایسا کر گزرئیے۔
اگر آپ چاہتے ہیں کہ لوگ آپ کو لیڈر مانیں تو انہیں اپنی شخصیت سے متاثر کریں،ان پر بے جا حکم نہ چلائیں۔اگر آپ انہیں متاثر کرنے میں کامیاب ہو گئے تووہ خود بخود آپ کے حکم کا انتظار کریں گے۔اکثر لوگوں کی یہ فطری خواہش ہوتی ہے کہ وہ کسی سے متاثر ہوں اور پھر اس کے گُن گائیں۔
صبح جلد اٹھنے کی عادت اپنائیں،اُس وقت فضا کائناتی انرجی سےبھرپور ہوتی ہے،ان لمحات میں یہ تصور ذہن میں رکھیں کہ کائناتی انرجی آپ کے جسم میں داخل ہو رہی ہے اور آپ کے جسمانی،روحانی اور نفسیاتی مسائل کو حل کر رہی ہے۔
آپ کو اپنی روزمرہ کی روٹین پرنظرثانی کرنی چاہیے،اگر آپ اپنے ٹائم ٹیبل پر کنٹرول حاصل کر لیں اور موڈ کی غلامی سے نکل آئیں،تو آپ کو بہت سا ایکسٹرا وقت مل سکتا ہے۔اس ایکسٹرا وقت کو آپ کسی تعمیری کام میں صرف کریں توآپ کی زندگی بدل سکتی ہے۔وقت کا بہترین استعمال ،ہر کامیابی کا گُر ہے۔
سانس لیتے وقت پھیپھڑوں کا صرف اوپر والا حصہ استعمال کرنے کی بجائے پورے پھیپھڑے استعمال کرنے کی عادت ڈالیں۔اس سے آپ تروتازہ بھی رہیں گےاورلمبی عمر بھی پائیں گے۔
اپنا مطالعہ وسیع کریں،اچھی کتابوں اور اچھے مضامین سے تعلق جوڑیں،اس سے آپ کو زندگی کے مسائل کو سمجھنے اور انھیں حل کرنے میں مدد ملے گی۔کتاب سے اچھا دوست اور کوئی نہیں ہوتا۔