مسائل کی موجودگی کے باوجود امید کا دامن نہ چھوڑیں۔آپ کے پاس بہت کچھ ایسا ہے،جسے آپ نظر انداز کر رہے ہیں،مگر بہت سے لوگ اُن چیزوں کے لئے ترستے ہیں۔آپ کو خدا نے بے شمار صلاحیتوں سے نوازا ہے۔اگر آپ میں کچھ خامیاں ہیں تو کچھ خوبیاں بھی تو ہیں۔تو پھر ناشُکری کیوں؟
اپنے ارد گرد نظر رکھا کریں،کسی کو آپ کی مدد کی ضرورت پڑ سکتی ہے۔ہو سکتا ہے کوئی عورت اپنے بیمار خاوند کے لئے لوگوں کی منتیں کرتی نظر آئے،یا کوئی بوڑھا سڑک پار نہ کر پا رہا ہو،یا کوئی بھوکا بچہ غبارے بیچتا ہوا نظر آئے۔ان کی مدد کے لئے خدا نے آپ کو وسیلہ بنایا ہے۔ان کی دعاؤں کی آپ کو ضرورت ہے۔
اگر آپ اپنا مستقبل بدلنا چاہتے ہیں تو اپنی عادات بدل ڈالیں،آپ کا مستقبل خود بخود تبدیل ہو جائے گا۔عادت بدلنا بظاہرمشکل لگتا ہے،مگرکامیابی کی سُہانی تصویر ذہن میں رکھی جائے تو پھر کوئی مشکل،مشکل نہیں رہتی۔یاد رکھیں کہ کامیابی کسی خاص عمل کو صرف ایک بار کرنے سے حاصل نہیں ہوتی،بلکہ اُس عمل کو باقاعدگی سے روزانہ کرنا پڑتا ہے۔
دنیا میں سب سے زیادہ بے وفا کون ہے؟یہ وقت ہے۔آپ اس سے جتنا زیادہ فائدہ اُٹھا سکتے ہیں ابھی اُٹھا لیں۔یاد رکھیں کہ بیس پچیس سال کی عمر تک وقت بہت آہستہ گزرتا ہے۔لیکن اس عمر کے بعد وقت نہایت تیزی سے گزرجا تا ہےاور پتہ بھی نہیں چلتا۔بالکل اسی طرح کہ جیسے دو دن کی چھٹی میں سے دوسرا دن زیادہ تیزی سے گزرتا محسوس ہوتا ہے۔اور فلم کا دوسرا حصہ پہلے حصے کی نسبت تیزی سے گزر جاتا ہے۔
صرف خیالی پلاؤ سے کام نہیں چلتا،عمل کا ہونا بھی ضروری ہے۔مستقبل اُسی کا ہوتا ہے جو حال میں اُس کی تیاری کرتا ہے۔سورج،چاند،ستارے،سیارے،کہکشائیں سبھی حرکت کر رہے ہیں۔حرکت ہی زندگی کا فلسفہ ہے،تو پھر آپ عمل سے کیوں گریزاں ہیں؟اُٹھیں!ہمت کریں!خدا آپ کے ساتھ ہے۔
اپنے کمرے کی چیزوں کی ترتیب بدلناآپ کی بوریت دور کرے گا اور آپ کو ایک نیا احساس دے گا۔
کوشش کریں کہ ہر وقت باوضو رہیں،آپ کو پر اسرار طور پرایکسٹرا انرجی ملے گی۔